BiodataDara bajik tuchum ngelinsum manis ti benung lekat di engkiung, Natala tu peranak menua pelilih Sri Aman, kala besekula ba SMK. St. Luke, lalu iya anak keempat ari tujuh iku diri menyadi. Lebuh ke datai ngagai opis kami di Tanjung Batu, Bintulu empai lama, berupai bendar Natala ngembuan budi basa lalu nadai sekali nunjukka ego diri tauka penyumbung ba mua kami taja pan populariti iya benung angkat maya ke diatu. Ari laba kami, tentu nya lilih ari pendiau sida sebilik tauka apai indai ti endang chukup atur sereta ajar ngagai bala anak.
Pengerindu iya ba pengawa belagu endang dikembuan kenyau ari mit, lalu ukai diturunka ari apai indai iya laban apai enggau indai iya endang ukai penanyi.“Nyau pemuas ke meda bala artis bukai belagu merindang peminat mayuh ba panggau, aku pan bisi ati deka ngujika nasit diri ba dunya pemerindang. Kami sebilik endang nyukung aku magang kelebih agi apai enggau indai aku empu,” pia ku Natala. Dikena nyikap diri nyadi pemerindang, Natala kala belajar vocal. Iya mega suah matih tauka ngelatih diri bekaraoke di rumah ngena minus one.
Kelimpah ari ti belagu, baka indu dara ke bukai, Natala mega rindu betanamka mayuh macham bungai sereta bebela ba dapur seraya ngujika pengelandik diri manduk mayuh macham resipi ke baru.
Album keterubah Natala ke diberi nama Badu Beraie ke direkod dalam taun 2005 di baruh lambang kompeni TBC (Tiew Brothers Company) ngundan mayuh lagu ke manah-manah baka Badu Beraie, Nuan Aku Sayau, Udah Nasit Tua, Enggai Beserara, Ambai Dua, Padam Pengerindu enggau Joget Bena. Taja pia, nama Natala maya nya bedau tentu pegari baka ke diatu.
Ditanya senentang penau diri ba main asal Iban, Natala madahka diri bisi pengelandik ngajat sereta bisi mega peneleba nebah gendang. “Enda ga malu enti ditarit ngajat,” pia ku Natala, “Ungkup diri bisi, nyangkung orang enda. Kitai ga sigi Iban, enda patut enda bemegahka adat enggau main asal bansa diri,” tambah iya seraya ke betundi enggau kami.Endang amat munyi ku Natala, enti ngasaika diri nya nembiak rebak baru enda nemu reti ngajat, tabuh, gendang tauka perengka main asal ke bukai, kitai patut belajar laban enti enda pia, main asal bansa kitai deka repuk ditelan jeman. Enti adat enggau main asal kitai lenyau, lenyau mega identiti kitai. Nya alai, pekara ke bansa tu enda tau enda diperatika kitai rebak diatu. Enti bansa kitai enda rinduka main asal diri, bansa bukai jauh agi enda rindu lalu enda ulih dikarapka kitai.
Baka artis ke bukai, kelebih agi nya artis indu, Natala mega enda ulih rari ari gossip. Iya kala digossip bisi nanggam pengerindu enggau Ery Lang tang iya madahka Ery Lang nya semina bakih artis iya aja. “Taja pan kami duai bepadu nyawa mai lagu Sumpah Tua sereta suah betawing kin kia, ukai reti kami duai nanggam pengerindu. Anang salah sangka,” pia ku Natala nyimpulka saut iya ba senentang gossip ke enda putus-putus tang enda mega iya lalu nyida ensiban ati laban iya nemu nya semina gossip lalu berita sebubu ngapa. “Nadai kebuah ga kitai ngenggai enti kitai amat enda ngereja lalu enda kena tempias beris jaku gossip nya” ku Natala. Dikena ngangkatka ubah jalai pengidup ke dudi hari ila, Natala bisi ngembuan juluk ati deka muka studio enggau saloon kediri empu. Nadai salah ngembuan juluk ati ti tinggi laban nya dikena meransang diri empu.
“Pengidup nyadi artis mayuh penguji. Pengasai ke pait ti udah nuntung aku enda ibuh aku madah ke kita, biar aku empu aja mih nemu. Kenang ti manis ke udah aku sepi sekumbang ke nyadi artis enda mega mimit. Siti ari iya, iya nya lebuh kami duai Nai Dinamik enggau orang masuk final ba Pekit Lagu Tebilang Iban 2006 ti diatur RTM, Miri. Ba pekit nya suba kami duai bulih gelar Persembahan Ti Pemadu Manah, iya nya kedua kali aku bulih gelar ke baka nya kenyau ari taun 2002,” pia ku iya.
Siti berita manah ngagai semua peminat Natala, ke diatu iya benung kiruh nembuka album solo iya ti ketiga. Berita ke ngerimbas pending kami di PIP, album iya ti ketiga tu diadang deka keluar enda lama agi. Sama-sama mih kitai nganti penatai album Natala ti baru nya lalu ngarapka iya mujur lalu majak tebilang. Kitai ngajihka Natala terus angkat nama, ukai semina tebilang diatu aja tang terus dikelala, terus dikerindu datai ke ila-ila. Ngena peluang tu, Natala meri besai terima kasih ke sukung peminat mayuh sekumbang iya ke udah nyadi artis lalu iya ngarapka diri terus dikerinduka peminat laban enti nadai peminat, sapa mih penanyi pia ku iya enti nadai sukung ari bala peminat.
Siummm duluuu kuyuuuukuuuuuu suluuuu~~ hiihih
Bungai Pengrindu ,
Enti nuan rindu ke Blog Bungai Pengrindu tau Follow / Subscribe Blog ambik nemu utai ke baru - baru di post Bungai Pengrindu.
2 comments:
aram nginti
What a great resource!
Catat Ulasan